MIDDELS - Ljouwert in sûne finansjele takomst
De rekken fan de ekonomyske en finansjele krisis wurdt nei de takomst trochskood. No't it ferhypteekjen fan de takomstige wearde fan huzen en bedriuwen op'e non rûn is stiet de oerheid, en dat bin wy mei-inoar, boarch. Nei 2011 sil dizze rekken betelle wurde moatte. Dat betsjut ek minder ynkomsten foar de gemeente Ljouwert fan út it Ryksregear. Ek de eigen ynkomsten út grûnferkeap steane ûnder druk. Tagelyk lizze de útjeften foar in grut part fêst. As FNP wolle wy net dat de gemeentlike lêsten omheech geane. Ek wolle wy dat de skulden yn de hân hâlden wurde. Dat betsjut mear út de wei sette mei deselde euro, mar ek de mienskip sels oansette ta oplossings en miskien it wichtichste, mei-inoar der plat foar. Frij oerset nei Kennedy: freegje net wat Ljouwert foar jo dwaan kin mar wat jo foar Ljouwert betsjutte kinne!
Aksjepunten:
- Gjin grutte prestiizje projekten mear. En de risiko's fan al rinnende projekten lykas Saailân en Súdlannen sa folle mooglik noch beheine.
- It yn de stringen hâlden fan de gemeentlike lêsten, gjin ferheging fan de gemeentlike belestings.
- Skulden net út de hân wei rinne litte en dêrmei takomstige rintelêsten foarkomme.
- Slutende mearjierren begrutting.
- Kosten yn de hân hâlde, ûnder oaren troch better projekt management en plannen oanpasse oan de nije omstannichheden.
- Iepen ein regelingen sa as de WMO slútend meitsje troch doelmjittiger mei de sinten om te gean en it ynfieren fan eigen bydragen.
- Inisjativen fan selsredsumens út doarpen en wiken wei stypje en begeliede.
- Net mear regels ynfiere as jo as gemeente útfiere kinne.
- Besykje mear jild út ‘Den Haach' en ‘Brussel' te krijen troch effektive lobby.
- In subsydzjedesk opsette (ynklusyf ynternet-side) om sa eksterne jilden foar gemeente, provinsje, ynstellingen en bedriuwen yn te heljen.
- By reserves dy't oer binne wurdt de klam lein op it oan de slach krijen fan de jongerein yn de gemeente Ljouwert.
