FEILIGENS - Ljouwert leefbere en sosjale stêd

Yn syn algemienens wol de FNP troch previntive maatregels de feilichheid ferbetterje. Wy wolle  ynvestearje yn minsken en buerten. Dat kin troch de ynset fan jongereinwurkers, aksjes om de ferkearsfeiligens te befoarderjen en befoardering fan de mienskipssin. De selsredsumens en sosjale kontrôle yn de buert kin fersterke wurde troch in gearwurkingsferbân fan plysje en buertopbouwurk. Neist de strafrjochtlike oanpak sille benammen ek maatregels rjochte op it fergrutsjen fan de leefberheid en fitaliteit op lokaal nivo nommen wurde moatte.

De FNP wol fierders mear wykaginten yn de doarpen en wiken; dúdlike sichtberens fan de plysje op strjitte ferminderet de kâns op geweld. Aginten moatte minder papierburokrasy krije, dat se mear tiid hawwe om de strjitte op. Út ferskate ûndersiken hat bliken dien dat kamera tafersjoch en previntyf fûllearjen hiel djoer binne en net effektyf. Dêr kiest de FNP mei om reden fan privacy net foar.

Oangeande de feiligens yn it útgeanslibben set de FNP ek yn op de sichtberens fan de plysje. De regel fan gjin tagong nei trijen wurket goed. Dat de snackbar en shoarmasaak dan wol iepen binne wurdt ‘gedoogd'. Hjir wol optrede tsjin yllegale ferkeap fan drank.

Aksjepunten:

• Besykje om de feiligens yn it ferkear fierder te ferbetterjen (gefaarlike ôfslaggen, aksje 25% minder ferkearsslachtoffers).
• It tsjingean fan te hurd riden yn wenbuerten.
• Mear plysjes op strjitte by jo yn de wyk en yn de binnenstêd.
• Struktureel mear jild foar jongereinwurkers.
• It stimulearjen fan aktiviteiten yn de binnenstêd, de wiken en doarpen om sa de jongerein de romte te jaan om har te ûntwikkeljen en ferfeling tsjin te gean.
• Twongen prostitúsje tsjin gean troch it projekt Asja en frouljusopfang Fryslân te stypjen.
• Omdat coffeeshops maatskiplik sjoen akseptearre wurde en ‘gedoogd' wurde, moat ek de oanfier dêrnei ta fan softdrugs legalisearre wurde.
• Stipe oan ferslavingssoarch om it misbrûk fan drugs en alkohol tsjin te gean.
• Wiidweidiger programma op middelbere skoallen om te wizen op de gefaren fan alkohol en drugs.
• Effektive oanpak fan de ‘veelplegers' trochsette.
• It stimulearjen fan de graffiti-keunst om sa oerlêst tsjin te gean.
• It tsjingean fan fytsstellerij, it feilichheid probleem mei de measte oanjeften, krijt in hege prioriteit.
• Behâld fan de stedswachten foar de feiligens yn wyk en op de bedriuwsterreinen.