LJOUWERT: DE STÊD- EN DE DOARPEN

Ljouwert as haadstêd fan Fryslân kriget binnen de besteande grinzen de romte om te groeien.

Dat betsjut ek mear omtinken en middels foar werstrukturearing, kwalitatyf ferbetterjen en ynwreidzjen fan de besteande wenwiken en bedriuwsterreinen.

By de útwreiding fan stêd en doarp moat minder wite skimmel en ienheidswoarst delset wurde. Bouwe foar kwaliteit, mei in attraktive miks fan wenten, grien en wetter, mei benammen ek omtinken foar goedkeape wenten. Ferskaat fan nije wenningen, in miks fan sosjale klassen, makket nije buerten better leefber.

De kredytkrisis liket de FNP yn de mjitte te kommen. Benammen yn de Súdlannen wurde mear betelbere wenten boud op minder grûn. De FNP pleitet derfoar om it iepen en kultuerhistoaryske wichtige greidelânskip om de stêd hinne, wichtich foar de lânbou, de greidefûgels mar ek foar de rekreaasje, safolle mooglik te behâlden: de kompakte stêd.

Aksjepunten:

• Griene longen hâlde: Potmarge, Griene Stjer, Rengerspark, Prinsetún en Kealledykje.
• It opstellen fan sinnekollektoaren fierder oanmoedigje.
• Yn wiken mei in lyts bytsje grien moat it grien dat der is der bliuwe, as boartersromte en as ôfwikseling fan ‘stien en beton'.
• Yn de doarpen wenningbou dy't oanslút op de fraach fan de minsken yn it doarp sels.
• Behâlden fan it greidelânskip foar greidefûgels en rekreaasje yn de iepen romte en de râne fan de Súdlannen en Stroomland.
• Mear hierwenten en minder sloop fan goedkeape hierhuzen.
• Yn stedswiken en op doarpen wurdt stribbe nei in ferskaat yn wenningbou om dêrtroch ek in ferskaat yn ‘e sosjale opbou fan ‘e befolking te krijen.
• Safolle mooglik iepenbiere oanbestegings, om alle bedriuwen in earlike kâns te jaan om yn te skriuwen.